Պատրաստ է արդյոք արդեն մեր հասարակությունը ընդունել շոուբիզնեսի այնպիսի կանոններ, ինչպիսիք են, այսպես ասած, մերկ ֆոտոսեսիաները: Անկախ այս հարցի պատասխանից, բոլորին իր համարձակությամբ ու նախաձեռնողականությամբ քաջ հայտնի DJ Vakcina-ին (Արուսիկ Մկրտչյան) հասարակության կարծիքն առանձնապես չի հետաքրքրում, նա ունի իր սեփական կանոնները:
Նա կարծում է, որ հասարակության ուշադրությունը հիմա ավելի կարեւոր բաների վրա պետք է կենտրոնացած լինի, այնպիսի խնդիրների, ինչպիսիք են բնապահպանությունը, առողջ ապրելակերպը` ընդհանրապես արտաքին եւ ներքին էկոլոգիան:
Պատահական չէ, որ Արուսիկը որպես կեղծանուն է ընտրել «Vakcina»-ն, իսկ գլխավոր սլոգանը` «ոչ թմրամիջոցներին, միայն վակցինա». նրա քարոզած ապրելապերպն իրոք մարդու ֆիզիկական էկոլոգիայի պահպանն ու իմունիտետի բարձրացմանն է ուղղված:
Այս խնդիրների վրա հասարակության ուշադրությունը գրավելու համար է հենց, որ Vakcina-ն միջոցների մեջ խտրություն չի դնում, չի մերժում ոչ մի հարցազրույց, աշխատում է (հիմա նաեւ` որպես «DJ լաբորատորիա»-ի հիմնադիր) անդադար եւ պատրաստ է իր գեղեցիկ մարմինն ի ցույց դնելով` այս միջոցը եւս օգտագործել մարդկանց ուշադրությունը կարեւոր խնդիրների վրա ուղղելու համար:
DJ Vakcina-ի առաջին սենսացիոն լուսանկարը լույս աշխարհ եկավ կապված ՁԻԱՀ/ՄԻԱՎ-ի դեմ պայքարի օրվա կապակցությամբ ֆոտոցուցահանդեսի հետ: Արուսիկը ՁԻԱՀ-ի դեմ պայքարի առաջամարտիկներից է:
Խոսակցություններ կան անգամ, որ այս խնդիրներն այնքան են հուզում երիտասարդ կին DJ-ին, որ նա պատրաստ է օգտագործելով իր երկրպագուների բազմահազարանոց բանակի պոտենցիալը` մտնել քաղաքականություն եւ ավելի պարտադրողական` օրենսդիրի դիրքերից զբաղվել իր համար առավել կարեւորվող խնդիրներով:
Նրա աշխատասիրությանը, համառությանը, հետեւողականությանն ու հմայքին ծանոթ մարդկանցից քչերն են կասկածում, որ եթե Vakcina-ն իրոք նման նախաձեռնություն ցուցաբերի, ապա մեծ հնարավորություն ունի հաղթանակած դուրս գալու:
|